PRANATA CARA ING LELAYU / KESRIPAHAN
Bismillahirrohmanirrohim.
Asslamamu’alaikum
Wr.Wb
Para pepundhen, para sepuh, para pini sepuh ingkang hanggung
mastuti dhumateng pepoyaning kautaman ingkang pantes pinundhi, para pangemban
pangembating nagari minangka pandam pandoming kawula dasih ingkang pantes
kinurmatan, para pambela sungkawa kakung putri ingkang pantes sinudarsana.
Madyaning panandhang ing ri kalenggahan punika kula piniji
dening para kulawarga panandhang inggih penjenenganipun Bp/Ibu...................................kinen
njejeri minangka pambiwara, ingkang tartamtu kaeneraken wontenipun tata upacara
badhe bidhaling layon.
INNALILLAHI WAINNA
ILLAIHI ROJI’UN
Sampun murut dhumateng kasedan jati suwargi
Bp/Ibu......................... awit saking lantaran nandhang
......................... ingkang punika saksampunipun pangruktining layon
sampun paripurna, keparengipun kulawarga ingkang nandhang dhuh kita inggih
panjenenganipun .................... ing hari kalenggahan punika dipun wonteni
tata upacara sawetawis ingkang sampun lumampah.
Sakderengipun kula ngaturaken lekasing sedya, sumangga nun
dhumateng para pambela sungkawa kakung putri tansah kula dherekaken
hangluhuraken asmaning Gusti ingkang maha kawasa. Karana rohmat saha sih
wilasanipun ingkang sampun rumentah dhumateng panjenengan sadaya dalasan kula,
saengga maksih saget ndherek bela sungkawakanthi pinayungan karaharjan tebih
ing sambekala.
Para pambela sungkawa kakung putri ingkang pantes
sinudarsana/sinubeng pakurmatan, wahyaning mangsa kala upacara hangkating layon
kaleksanakaken, wondene reroncening adicara kados sampun karakit dening para
kulawarga, ingkang punika panata cara ngaturaken reroncening adicara :
1.
Sepindah pambuka
2.
Atur
pambagyaharja
3.
Atur bela
sungkawa
4.
Donga dening
bapak Kyai.....................
5.
Upacara Tlusupan
6.
Panutup
Para pambela sungkawa ingkang pantes kinurmatan,
makaten reroncening adicara ingkang rinakit dening para kulawarga, nuwun.
Sumangga acara bidhaling layon kita buka kanthi
waosan basmalah....................................
Acara ingkang kaping
kalih atur pambagya harja para pambela sungkawa kakung putri ingkang sinuba ing
pakurmatan nadyan panjenenganipun Bp/ibu ................... ing wekdal punika
raosing manah mboten saget ginambaraken ing mriki karana kawontenan ribet
kaworan bebeg, parandene kaparengaken sedya badhe matur wonten ngarsa
panjenengan, nuninggih atur pambagya harja yuwana miwah atur panuwun, karana
bebeging manah mboten kuwawi matur amung kandheg wonten madyaning jangga,
pramila ingkang piniji minangka sulih salira tanulyan/ mboten wonten malih
panjenenganipun Bp. ................. wekdal kasumanggakaken.
Para pambela sungkawa,
para ta’ziah, ta’ziin ingkang kinurmatan, kanthi terwaca cetha atur pambagya
harja saking bp ........................ minangka sulih salira kulawarga
panandhang. Ingkang salajengipun ngancik atur bela sungkawa dening tetuwangga
ingkang sampun pana keblating panembah pana ing pamawas lebda ing pitutur,
wondene ingkang nylirani nuninggih panjenenganipun ........................
wekdal kasumanggakaken. ................................... kita aturaken
agunging panuwun ingkang tanpa pepindhan kulawarga panandhang dupi
midhangetaken tutur bela sungkawa sawatawis dhumateng panandhang, awit bela
sungkawa panjenengan mugi dadosa sarana kulawarga ingkang dhuh kita enggal
pinaringan katentreman pulih kadosa wingi.
Ingkang salajengipun
mugi rohipun suwargi Bp/ibu ..................... tansah pinaringan pangapunten
saha tansah katampi anggenipun sowan pangayunaning Gusti ingkang maha Agung
dipun wonteni donga kunjuk wonten ngarsa dalem Gusti Allah ingkang murbeng
dumadi, wondene ingkang piniji nuninggih panjenenganipun Bp............. wekdal
kasumanggakaken.
Para pambela sungkawa
kakung putri ingkang pantes sinudarsana, angkating layon badhe kaleksanan
dening para para kulawarga panandhang, ingkang punika dhumateng panjenengan
ipun para kulawarga ingkang piniji hamanggul pethining layon kasuwun samekta
ing gati.
Para pambela sungkawa
kakung putri ingkang berbudhi darma, pethining layon sampun kapanggul dening
para kulawarga, wonten sangajenging wisma dhuh kita, kepareng ing sedya badhe
hanetepi tata cara brobosan, dhumateng para putra wayah ingkang badhe netepi
tata cara brobosan mugi samekta ing gati, wondene ingkang mrati tisaken
panjenenganipun Bp..... sumangga nun.
Para pambela sungkawa
kakung putri ingkang pantes tampi pakurmatan, makaten menggah lampahing upacara
bidhaling layon, layon badhe kapetak saha kasarekaken wonten ing astana laya
.......................... sru panyuwunipun para panandhang, hambok bilih para
pambela sungkawa mboten wonten pambengan, kasuwun mangke ndherekaken bidhaling
layon dumugi ing astana laya ........................... wondene wonten
pakaryan ingkang wigati kulawarga panandhang hamung saget ngaturaken panuwun
saha ngaturaken sugeng kondur.
Kula pribadhi minangka
pranata cara mbok bilih anggen kula ngaturaken urut reroncening adicara wonten
kiranging trapsila, suba sita miwah kiranging basa tuwin sastra, karana budi
dayaning manungsa kirang sampurna kridhaning ati datan bisa mbedhah kuthaning
pasthi, mawantu wantu nyuwun lubering pangaksama.
Ing wasana akhirul kalam billahi taufiq wal hidayah
wasssalamu’alaikum Wr.Wb
